*فلسة فرح بايقاع طبول الحرب..*
على جعفر
غايتو يا ناس الفارعات، وريتونا.. *تحتفلوا بأي شئ* بس عايزين موضوع التقول مع الحرب دي ضارباكم *فلسة فرح..*
ناس علم النفس قالو النرجسيّة إنك تملأ فراغك النفسي *بفلاشات الكاميرات،* وتشوف نفسك إنك *”رائد فضاء”* راجع من كوكب المريخ بشوالات دهب، والعالم ده ذي *”الاستوديو”،* كلو واقف يستقبلك ويصورك ويكسر ليك التلج..
الواحد تلقى جارو ماعارفو قاعد ولّا مسافر، يدفع من جيبو للإعلام عشان يكتب ليهو *”ترقبوا وصول مسؤول كبير جاي البلد..”*
نصيحة، قبل ما تدفع للإعلام عشان يكتب ليك *”ترقبوا وصول القائد”،* جرّب تمشي الدكان الجمب بيتكم. لو سيد الدكان سألك: “إنت كنت وين الأسبوع الفات؟” معناها إنت لسه في السليم.. لو ما عرفك أصلاً، وفّر قريشاتك دي واشتري بيها “رصيد” وصلي واستغفر ربك، لأنك بالنسبة للعالم *(لسه خارج التغطية)* تماماً..
التلج الكتير ده بيعمل *”انزلاق غضروفي”* في الشخصية. والبكسرو ديل، أول ما تخلص القروش الجغموها، حيخلوك *زي الماسورة الضاربة في نص الشارع،* يعاينو ليها وماف زول يصلحا.
كسرة: طبعا كوكب المريخ مامعروف فيهو دهب ولّا لا.. لحدي الآن العلماء لقوا فيه *”تراب أحمر”* وصخور وشوية ثلج، تشبيه *”شوالات الذهب”* دي هنا جا من خيالنا المريض، مريض بوكو..
