كانت من الصابرات على صعوبة التحدي .. اجتهدت …وقاتلت ..منذ ظهورها الأول في الوسط الفني الذي لن يستطع أحد المكوث فيه إلا إذا كان صاحب عزيمة و يمتلك موهبة ، الكثيرون تنبأوا لها بمستقبل اخضر ، بل راهن آخرون علي صوتها (المختلف) و لونها المميز فيما تسيدت (بحتها) صالات الافراح داخل وخارج و السودان ، كيف لا وهي تفرض اسمها بقوة ، وتنافس بشراسة حتي أصبحت (من الأرقام المميزة)..أنه صوت مشبع بالطرب ومكتنز بالحيوية …صاحبة حنجرة ذهبية تنقل بسلاسة الدهشة ..إنها بت موهوبة و (غناية) بمعني الكلمة عندها احساس مختلف وبصمة فريدة وتمتلك خامة صوتية تستحق ان تجاز وتضمن في مقررات كلية الفنون .. صوت نسائي يضاهي نجمات الغناء في الزمن الجميل فنانة ذات بصمة خاصة ذلكم هي ابنة حبيبتي ود مدني الفنان ايمان الشريف ابنة الأستاذ الموسيقار الكبير (عبد الله الشريف) المعروفة ب (ايمان بت الاهلية)
ايمان الشريف في بداياتها وقبل أن تتمرد علي ترديد أغنيات الآخرين استطاعات إقناع جمهورها باغنياتها الخاصة ذلك النهج الذي ضاعف من احترام المثير من رصيدها الفني واسهمت بشكل كبير في منحها كل تلك النجومية خصوصا وأن اغلب أعمالها الخاصة جاءات بعيدة تماما عن الرداءه والابتذال و(الانحطاط) ، في فترة بسيطة قدرت ايمان الشريف أنها تعمل ليها رصيد فني من أغنياتها الخاصة وقدرت(تربى) جمهور خاص بيها ، حيث اننا نلاحظ الحاجة دي في اي بيت سوداني بترديد أغنياتها الخاصة برغم من صعوبة كلمات بعض الأغنيات ودا يعتبر نجاح كبير جدا
ايمان الشريف حافظه كمية من الغناء البيخليها عندها مقدرة غريبة علي التحكم في المزاج العام بالإضافة لطلتها الحلوة وعندها (هيبة حقيقة) ما مصنوعة بتعرف متين تغني شعبي ومتين تغني حقيبة ومتين تغني دلوكة و هجيج، بالإضافة لي العلاقة الحلوة بينها وبين الفرقة الموسيقية يلا العلاقة دي بتخلي مزاج العازفين رايق..وبتنقلهم مت إطار الوظيفة الضيق لا إطار(المتعة الواسع)
انسانة طموحة مجتهدة وصبورة لا بتعرف مستحيل ولا بتعرف (الشغلة دي خليها لي بكرة) واكتر حاجة بتميز ايمان انها عارفة تماما (إطار النجومية ) المفروض تغني فيهو وما تطلع منو لان هو الاداها (الهوية الفنية) ..ودي مشكلة بتواجه فنانين وفنانات كتار جدا ..بيحاولوا دائما يطلعوا من الأطار دا وبيتعرضوا لفشل ذريع
اخيرا ايمان دي (غناية ) ولما يقولوا ليك الزول دا غناي معناها بطرب روحو قبل الجمهور…وطبعا دي حاجة ظاهرة شديد في ايمان…تتفقوا معاها ولا تختلفوا..حاليا هي الفنانة الوحيدة البتديك الاحساس الحقيقي للغناء..تمتلك صوت ثابت..وتطريب عالي وحفظ متقن لاصعب الأغنيات ودا كلو كوم ..والحب البتلقاهوا من جمهورها دا كوم تاني…ايمان الشريف موهبة حتي الثمالة وتمتلك مت مفاتيح الإبداع ما يسهل له دخول الكثير من قلاع النجاحات ذات الاقفال الصعبة فقط ينبغي عليها المحافظة على هذا المستوي او التطوير أكثر لمستوي اعلي لان اي نزول من المستوي دا ولو درجة واحدة ممكن يعمل مشكلة وعليها أن تعلم جيدا ان هذه المرحلة هي أخطر مراحل تجربتها الفنية بشكل عام لذلك عليها ان تكون ذكية وان تستفيد من التجارب التي سبقتها ، ختاما نتمني لها مزيد من النجاح والتميز