خليك واضح _ حالتو السماني ماجاب الثاني !! محمد الطيب كبور

غرفة تسجيلات الهلال مليانه لاعبين لدرجة تخليك تتخيلها زي الداخلية الفيها السراير دبل ودا كلو من آثار ضربة سيما الأليمة وحالتو السماني ما استجاب لهتاف جمهور المريخ ( يالسماني عليك الله جيب الثاني ) والا كان الشطب لحق حتي عبدالرؤوف لكن السماني راعي العشرة والزمالة عشان كدا ماجاب الثاني والطريق لشباك جمال سالم كان سألك جدا بدفاع منهار تماما ولكن السماني ونجوم الزعيم عملوا بنظرية (ارحموا عزيز قوم ذل ) فاكتفوا بهدف نظيف ظريف عشان الفريق الازرق مايتفرتق اكثر من ماهو مفرتق وجمهوره كان واعي جدا وحمدالله علي الخسارة بهدف نظيف وظريف وفي قروباتهم الزرقاء حتوا قرض وبالصوت العالي قالوها وكتبوها ما عندنا فريق وديل مالاعبين والخسارة واحد صفر مكسب كبير حتي الاعلام الأزرق كان واضح وصريح لأول مرة واعترف بالهزيمة ..

الموسم الجديد هلال جديد مجهول الهوية شئ أهلي شندي وشئ هلال بورتسودان وجزء كمان من ماضينا ولهلال الأبيض كمان نصيب بالإضافة لمحترفين قالو عليهم قنابل والطاهر يونس شغال فلاشات ومن كترت الصور حفظنا عدد سنونو صم والميدان فعل ما كلام وبكره بنشوف القنابل والقصة مامليارات وفلاشات وخلاص والمعطوب من السليم بظهر والجقلوبه بتكتر ويرجعوا يقولوا يا حليلك يااطهر وكل الجمال في اللابس احمر واصفر واصلا كشف المريخ مليان وعامر والجدد زيادة خير وبحر الزعيم مابيابا الزيادة والحمدلله العين الفاحصه موجوده مع اني ضد تسجيلات الكوته لانو المريخ مختلف من الفريق الجماهيره مكبوته ومامحتاج إضافات كثيرة الا لو من باب خير وبركة ولمزيد من التنافس بين الحرس القديم المشهود ليهم بأنهم الأفضل في الساحة وبين القادمين الجدد ..

 

نهر السوباط الهلالي ضخ المليارات وظن الاهله أنهم مسيطرين علي الأوضاع ولكن ناس المريخ لمن ختوا الكورة واطه وحازم وسوداكال اتفقوا بقينا نتكلم عايزها كاش ولانحول ليك في حساب لو عايزه دولار  ذاتو مافي مشكلة أهم حاجة عندنا راحة اللاعب وتوالت الضربات علي الاهله السماني ماجاب الثاني لكن الثاني جابو سعادة القنصل حازم مصطفي بتوفير الكاش وانتهي النقاش واخر حاجة أمس تمبش بقي جوه الكشف الاحمر والجقلبه في قروبات الهلال حاصلة ..

 

أكثر وضوحا

صفقة تمبش مدافع الأمل الصنديد خبطة معلم وتدعيم كبير لدفاع المريخ في أهم الخانات وبوجود التايقر والقائد امير والصنديد تمبش نقول وراء مؤمن ..

تم تأجيل اجتماع الفيفا مع مجلس إدارة الاتحاد العام عبر تقنية الفيديو بخصوص الأزمة المريخية لليوم بعد ان كان من المفترض ان تكون بالأمس وان شاءالله اليوم يحسم هذا الملف ..

شائعة بغيضه من نفس مريضه عمت الميديا بالأمس بوفاة الهرم الإعلامي الأستاذ عبدالرحمن عبد الرسول والذي هو في أتم الصحة والعافية أمنياتنا الدائمة له بدوام الصحة ..

خالص تعازينا للزميل الصديق معتز عبدالقيوم (قابيتو ) في وفاة والدته ونسأل الله ان يتقبلها مع الصديقين والشهداء وان يرحمها ويغفر لها ولمعتز والأسرة حسن العزاء والصبر الجميل ..

مجرد سؤال

تاني بتجوا ؟؟