محمد عبد الماجد يكتب: خلوها على الله..!!

• في مثل هذا اليوم بتضرب 2 × 3 بتطلع ليك بـ7.. قدر ما تحاول تعرف الواحد دا جاء من وين ما بتعرف.
• تقسم 8 ÷ 4.. تقول تطلع ليك بـ2 بتلقاها طلعت ليك بـ3.
• يا جماعة الحاصل شنو؟
• ناس الدعم السريع ديل دخلوا على جداول الضرب!!
• تعاين للساعة مفروض تكون خمسة.. تلقاها 12.. والشمس عاوزة تغيب.. تسأل أي زول يقول ليك 12.
• جداول الضرب عرفناها.. الوقت مالو كمان؟
• تفتح المروحة في 2.. تشتغل ليك في 5.
• إنتو المروحة دي جنّت؟
• تمشي (الفرن) عشان تجيب (الرغيف).. تجي راجع شايل ليك (لبن).
• أمك تقول ليك: عاد يا ولدي الفول دا عاوز تاكلوه باللبن كيف؟
• إلّا أعمل ليكم بعدين في العشاء فطير.. لكن هسع تفطروا بي شنو؟
• ترجع الفرن عشان تجيب (الرغيف).. تجيب ليك (رصيد).
• إنت مالك الليلة؟
• عندك مشكلة مع (الرغيف).
• يلاقيك خالك عثمان في الشارع.. أخو أمك عديل.. تقيف فوقو.. قدر ما تحاول تذكر الاسم ما تقدر.
• يا ربي الزول دا شايفو وين؟
• الشبه دا أصلو ما غريب عليّ.. وهو معاكم في البيت.
• خالك يقول ليك يا زول إنت الليلة مالك؟
• تفتح التلفون.. عاوز تدخل الواتس.. تلقى نفسك دخلت الأستديو.
• عاوز تضرب لي أحمد.. تلقى نفسك ضربت لي حسن.
• ما تعرف تقول ليه شنو؟
• رمضان كريم يا حسن.
• وتقفل على كدا.
• ضلك بكون زي الشايل ليه (بطارية) وراك.
• ونخرتك في الضل بتبقى زي الما نخرتك!!
• وقميصك الأخضر.. يبقى ليك لونو طشاش طشاش.. أنا القميص دا جبتو من وين؟
• والمُناسبة شنو عشان أطلعه من الدولاب؟
• في هذا اليوم.. تقعد تفتِّش عن (شاحن الموبايل) بدون مُناسبة كدا تقلب البيت قلب.
• تنكِّت الدولاب.. ضلفة ضلفة.
• ترفع (المراتب).. أصلو أي حاجة بتروح بتلقاها تحت المرتبة.
• ما عارف السر في ذلك شنو؟
• تعمل جوطة في البيت.. وتقول ليهم مية مرة قلت ليكم ما في زول يقرب من شاحني دا.
• أي زول يشحن تلفونو بشاحنه.. يكلموكم ألف مرة.. أنا الشهر دا اشتريت لي أربعة شواحن.. كلها راحت في البيت دا.
• تعاين فوق الدولاب وفوق التلاجة.. والتلفزيون.
• وتحت السرير.
• والشاحن قدّامك في (التربيزة).
• الحاجة بتقول ليك بقيت ما بتشوف.. الشاحن ما أهو قِدّامك!!
• الباب يدق.. تفتح التلفون.
• ألو معاي منو؟
• واحد من ناس البيت يقول ليك البدق الباب ما التلفون يا خال!!
• تقول في نفسك أنا أحسن حاجة الليلة (أكتل) الوقت وامشي على الخالة في الحاج يوسف.
• تلقى نفسك حائم في الكلاكلة.
• الجابك الكلاكلة شنو ما عارف؟
• جيت ليه ما عارف؟
• وصلت كيف ما عارف؟
• الليلة اليوم بكون غريب.
• تودي الكوز على خشمك.. يلحقوك في آخر لحظة يقولوا ليك يا زول دا أذان العصر.
• تدخل وتطلع.
• وتقيف بدون مُناسبة.
• وتقعد بدون مُناسبة.
• تقول تنوم شوية.. النوم يطير من عينك.. ويبقى ليك زي حدائق بابل المعلقة.
• تدخل الفيس.. الفيس يبقى ليك زي دلالة الجمعة.. كلهم بكوركوا في مباراة الهلال.

• إنت بتفتكر في البداية الموضوع دا من الصيام.. والصيام والله العظيم ما عندو أي علاقة.
• الشيء دا من المباراة.
• الحالة دي بتبقى عليك.. يوم الهلال يكون عنده مباراة صعبة.
• والليلة المباراة مع الصعوبة.. بتعدي غادي.
• حسبنا الله ونعم الوكيل.
• نسأل الله تعالى الليلة الانتصار للهلال.
• نحن بعد كل هذا الكلام ومع صعوبة المباراة واسم الأهلي.. عندنا ثقة في تأهُّل الهلال.
• ثقة كبيرة.
• أي زول بتلقاه.. البتعرفو والما بتعرفو.. بقول ليك: الهلال ح يتأهّل إن شاء الله تعالى.
• أصلو ما بنخاف.
• ولا بنتراجع عن هذه الثقة.
• الناس ديل ثقتهم ما بتروح ساكت.
• لو مصر كلها 120 مليون نسمة كانت في إستاد القاهرة.. الليلة الهلال إن شاء الله سينتصر.
• عندنا ثقة أنّ الكرة تنصفنا.
• عندنا (10) نقاط.. وعندهم (7) نقاط.
• خسرنا مرة واحدة.. وخسروا مرتين.
• الهلال دخل مرماه (3) أهداف.. والأهلي دخل مرماه ( أهداف.
• الليلة نحن عندنا عشم كبير في أن تستجيب الكرة للمنطق.
• عاوزين المنطق ينصفنا.
• أكبر خسارة تعرّض لها الهلال كانت بهدف وحيد.. وأكبر خسارة تعرّض لها الأهلي كانت بالخمسة.
• الأهلي اتّفق مع القطن على أن يخسر أمامه 0/ 4.. والهلال لعب مباراته مع القطن في ظروف صعبة.
• غلبنا الأهلي بهدف قالوا الشمس.. وموية الصرف الصحي.. ومشوا اتغلبوا عادي من صن داونز بالخمسة في بريتوريا!!
• ما بنخاف من ظلم التحكيم.. لأنّ ثقتنا في عدالة السماء كبيرة.
• وحسبنا الله ونعم الوكيل.
• الهلال أضاع التأهُّل في أم درمان عندما أضاع ضربة جزاء أمام صن داونز في الدقيقة 90.
• لكن إن شاء الله نحقق التأهُّل في القاهرة.
• قبل ذلك أضاع الهلال ضربة جزاء أمام الأهلي.. ونقض الحكم هدفاً صحيحاً للغربال.. يعني المباراة كانت على الأقل يمكن أن تكون 3 / صفر.. غير هدف روووفا الذي ضاع في آخر دقائق المباراة.
• الأهلي كان سوف يكون في حاجة للفوز 4 / صفر عشان يتأهّل.
• كل ذلك لم يحصل.
• وحسبنا الله ونعم الوكيل.
• ما حصل هو أنّ الحظ لم يخدم الهلال في المباريات السابقة.. ونسأل الله تعالى أن يكون (التوفيق) حليف الهلال اليوم.
• أهم شيء في مثل هذه المباريات (التوفيق).
• نسأل الله تعالى التوفيق لفلوران في التشكيلة التي يختارها وفي الطريقة التي يلعب بها.

• نسأل الله تعالى التوفيق لأبي عشرين.. لفوفانا.. أي واحد يلعب فيهم.
• نسأل الله تعالى التوفيق لأبي عاقلة.. لأن أبي عاقلة لو كان في يومه.. الوسط بكون تحت السيطرة الزرقاء.
• نسأل الله تعالى التوفيق لإرنق وديوف واباغنا وانغوما ورووفا وجارجو ومزمل.. وأطراف الهلال في الشمال وفي اليمين.
• نسأل الله تعالى التوفيق للغربال وليليبو.
• نسأل الله تعالى التوفيق للجميع.. بما في ذلك من سوف يشارك في المباراة كبديل.
• ونتمنى ونسأل الله تعالى أن لا يكون الأهلي اليوم ليس في يومه.. وأن يكون التوفيق خصيماً ليه.
• نسأل الله تعالى أن تخرج جماهير الأهلي الـ(50) ألف مُشجِّع اليوم مهزومة ومُحبطة وحزينة.. كما نسأله تعالى أن تخرج جماهير الهلال في إستاد القاهرة مع قلتها وهي منتصرة وسعيدة وفرحانة.
• إن شاء الله الشناوي أو علي لطفي.. تاني يقول الشمس.. والمباراة تلعب ليلاِ.
• عاوزين نشوف شوبير بيشكي.. وشبانة رأسه ضارب.. وقناة الأهلي بتعرض مباراة في كرة السلة لفريق الأهلي.
• عاوزين نأخذ حقنا من الإعلام المصري ومن مواقع التواصل الاجتماعي لجماهير الأهلي ومن أي زول شكّك في قدرات الهلال أو قلّل منه.
• الليلة نسأل المولى عز وجل أن يكون سحرونا بحمد الله وشكره على انتصار الهلال.
• إن شاء الله يأتي السحور ونحن في قمة السعادة والنشوة.
• وحسبنا الله ونعم الوكيل.
• ………….
متاريس
• تاني ما في حاجة.
• خلوها على الله.
• سلموا أمركم ليه ولن تخذلوا إن شاء الله.
• سوف نعود ونكتب بفرح.
• الليلة السحور بفرح إن شاء الله.
• والفرحة صباحي بإذن الله تعالى وتوفيقه.
• وحسبنا الله ونعم الوكيل.
• والله غالب.
• ………
• ترس أخير: بكرة لقاؤنا على فرح إن شاء الله تعالى.