بعد سرد قصة اعتزالها للغناء، من هي المطربة زيزي عادل

النورس نيوز _ وكالات عالمية

زيزي عادل، تحدثت الفنانة زيزي عادل عن قصة اعتزالها للغناء وذلك من خلال لقائها في برنامج “كلام الناس” والتي تقدمه الإعلامية ياسمين عز عبر شاشة “mbc مصر”.

وقالت الفنانة زيزي عادل: “لما كنت مطربة وقبل الاعتزال كان شغلي الشاغل اللايكات والفيديوهات والحفلات واللبس وهعمل شعري إزاي واسم الأغاني واكتشفت حاجة مهمة إني مش هاخد معايا في لقاء ربنا حاجة من دول”.

وتابعت: “لقيت إني مش هاخد معايا حاجة لما أقابل ربنا غير أعمالي، وبدأت أفكر إني مش مستعدة تمامًا إني أقابل ربنا باللايكات والحفلات والصور، فكنت عايزة بيني وبين نفسي إني أحس إني مستعدة للقاء الله خصوصًا بعد موت ناس صغيرة على معرفة بيهم في فترة كورونا”.

وتابعت: “اكتشفت أن الموت ما لهوش سن ومفيش حاجة اسمها بدري، وهذا كان سر خوفي واعتزالي الغناء لأني ما كنتش مستعدة أقابل ربنا”

هل الغناء حلال أم حرام؟
ولفتت: “علشان أغني لازم أعمل فيديو كليب وأستعين بموديل يطلع معايا وهطلع وفيه قصة ولابسة لبس معين وحاجة غلط بتحصل في النص، وعلشان أقول كلام أغنية فيه حب أو هجر أو عتاب فهذا به تحريك مشاعر للناس اللي بتسمعه، فهي الفكرة كلها حرام، وعلشان أطلع أغني على المسرح لازم ألبس فستان وأتحرك مع الموسيقى ودا حرام، وفيه حاجة كانت بتجنني في الحفلات موبايلات الناس اللي بتصور من زوايا معينة وبيجبني ويزووم من الحتة اللي هو عايزها وهو بيروح علشان يصور مش يحضر الحفلة، فكنت معرضة أتصور على كل موبايلات الناس وأكون مباحة ومتاحة لكل الناس ودا حرام، فلقيت إني مش حابة أكون متاحة لكل الناس، وطريقة لبسي بعد الاعتزال اتغيرت وبقيت محتشمة وينقصني بس الحجاب”.

وعن دور الداعية مصطفى حسني في اعتزالها، أوضحت زيزي عادل: “اخترته لدعمي في قرار اعتزال الغناء لأني بحب أسمعه وبتابع فيديوهاته من قبل الاعتزال، وبحب كلامه وهو بيتكلم عن التسامح وأمور إيجابية جدًّا، وبيقدر يوصل لي المعلومة بطريقة حلوة وهو كلامه مريح”.

وبعد حديث الفنانة زيزي عادل عن قصة اعتزالها الغناء، ترصد فيتو من خلال السطور التالية أبرز المعلومات عنها:

زيزي عادل
ولدت الفنانة زيزي عادل عام 1987 في الكويت وتخرجت في معهد الموسيقي العربية.

الفنانة زيزي عادل بدأت بالغناء في كراول المدارس وحصلت علي أفضل صوت للمدارس.

غنت الفنانة زيزي عادل وهي في العاشرة من عمرها أغنية “زي الربيع” بمناسبة عيد الأم، وفي عام 2004 شاركت في برنامج اكتشاف المواهب الشهير “ستار أكاديمي” ووصلت إلى النهائيات واحتلت المركز الثالث.

وفي عام 2007 تم إصدار أول ألبوم غنائي للمطربة زيزي عادل بعنوان “واحدة طيبة”، وفي عام 2008 قدمت أغنية منفردة “اتعودت عليك” من كلماتها وألحانها.

وفي عام 2014 حققت المطربة زيزي عادل نجاحًا كبيرًا بـ أغنيتها الشهيرة “شيلالهالك” وفي عام 2015 أصدرت ألبوم غنائي بعنوان “أنا أنثى”.

كما أن الفنانة زيزي عادل غابت عن الساحة الفنية لمدة 7 سنوات بسبب مرض والدها الذي توفي في عام 2012.

اعتزال زيزي عادل
وفي شهر أبريل الماضي، أعلنت المطربة الشابة زيزي عادل اعتزالَها الغناء نهائيًّا؛ لتستطيع التقرب من الله تعالى، مؤكدة أنها أخذت القرار منذ فترة للبُعد عن مغريات الحياة.

وأضافت زيزي عادل خلال فيديو نشرته عبر حسابها الشخصي على موقع التواصل الاجتماعي “إنستجرام”: “قررت أسيب مهنة الغناء، والقرار أنا مخدتهوش امبارح.. أنا واخداه من فترة كبيرة جدًّا، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوي”.

وأضافت: “الناس القريبة مني عارفين نفسهم، ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء”.

وتابعت: “أنا عاوزة أقول كمان الفن هو مصدر دخلي ورزقي، وأنا بسيب حاجة بعيش منها وسبتها وعارفة إن ربنا هيرزقني، وأنا راضية جدًّا عن قراري ومبسوطة جدًّا بيه وحابة اللي جاي جدًّا، وحاسة إن حياتي اختلفت تمامًا”.

وأردفت: “يمكن لما أخدت القرار تعرضت لمواقف واللي تسمى اختبار من ربنا، وكان اختبار صعب والإنسان ضعيف، لأن جالي عرض ما جاليش وأنا بمارس مهنة الغناء، لكن الحمد لله ربنا كرمنا وقدرت أرفض من دعم من ناس حواليَّ”.

واستطردت: “أنا حابة أموت وربنا راضي عني، ويمكن دي حاجة كلنا بنتمناها، فأنا مش عارفة هموت إمتى لكن كل اللي عوزاه أكون مستعدة لمقابلة ربنا، وأقابله وأنا راضية عن نفسي وحياتي وأفعالي، والحمد لله ربنا كرمني والتزمت، وربنا يكرم ألتزم أكتر وادعولي أن ربنا يثبتنى على اللي أنا فيه”.